Policia e Vlorës ka goditur një rast mashtrimi dhe zhvatjeje në grup, ku të dyshuarit ishin duke vepruar si zyrtarë të lartë shtetërorë përmes platformës “Signal”. Ky rast, i lidhur me skemën e bujshme të Florian Gjergjit, është zbardhur në kuadër të operacionit të koduar “Notification”.

Sot, më 6 Shtator 2024, Policia e Vlorës njoftoi finalizimin e operacionit për “goditjen e një rasti të mashtrimit të operatorëve ekonomikë”. Në këtë operacion, tre persona janë arrestuar, mes të cilëve një çift bashkëshortësh dhe bashkëpunëtorja e tyre. I dëmtuari, një operator ekonomik në zonën turistike të Himarës, kishte denoncuar se i ishin kërkuar 8 mijë euro.

Sipas njoftimit të policisë, ndërhyrja është kryer me dorëzim të kontrolluar nga agjentët, duke futur të dyshuarit në kurth. “Ndërhyrja u bë pas denoncimit nga administratori i një subjekti tregtar në Himarë, që raportoi se i ishte kërkuar një shumë parash gjatë komunikimeve në aplikacionin ‘Signal’. Si rezultat i veprimeve hetimore të kryera në kuadër të këtij operacioni, u identifikuan dhe u arrestuan shtetasit: S. D., 30 vjeç, dhe K. D. (K.), 32 vjeç (bashkëshortë), si dhe D. V., 27 vjeçe, të tre banues në Vlorë,” tha policia vendore.

Hetimet kanë treguar se të dyshuarit, pasi kanë kontaktuar biznesmenin nëpërmjet një numri telefoni të regjistruar si kontakt i një zyrtari në aplikacionin “Signal”, kanë rritur besueshmërinë e kërkesave të tyre për të marrë shumën prej 8 mijë euro. Në cilësinë e provës materiale janë sekuestruar 1 automjet dhe 4 celularë. Hetimet për identifikimin e shtetasve të tjerë të përfshirë në këtë veprimtari kriminale vijojnë ende.

Drejtoria Vendore e Policisë Vlorë apeloi qytetarët që të raportojnë menjëherë çdo rast të mashtrimit apo përpjekjes për mashtrim, për të parandaluar raste të tilla.