Kryeministri Edi Rama ka bërë të qartë në Asamblenë e Partisë Socialiste se do të ndërmarrë masa të ashpra ndaj sipërmarrjeve që nuk deklarojnë pagat reale të punonjësve të tyre. Rama njoftoi se sipërmarrësit që fshehin pagat do të përballen me të njëjtën trajtimin që është rezervuar për hajdutët e energjisë elektrike.

“Javën e dytë të muajit të ardhshëm do të nisim të ndajmë me pensionistët një pasqyrë të ideve tona për rritjen e pensioneve, por gjithashtu do fillojmë informimin mbi zbatimin e një plani kombëtar për garantimin e sigurimeve shoqërore. Ky plan, që është në punë prej muajsh, ka për qëllim të përfshijë pensionistët në ndarjen e të ardhurave nga rritja ekonomike dhe të shkojë përtej nivelit të bonusit të fundvitit dhe indeksimit. Mund të them troç, rritja e të ardhurave nga shteti për pensionistët në vitet në vijim nuk mund të jetë domethënëse nëse nuk i japim të gjithë bashkë, si shtet, qeveri dhe shoqëri, një goditje domethënëse fenomenit të fshehjes së pagave që ndikojnë në të ardhurat për sigurimet shoqërore dhe vjedhin atë që u takon pensionistëve,” tha Rama.

Ai e shpjegoi këtë qasje duke e krahasuar me mënyrën si është trajtuar problemi i faturave të energjisë elektrike: “E thënë me fjalë të tjera, do bëjmë me kuotat e sigurimeve atë që bëmë me faturat e energjisë. Ata që s’u paguajnë sigurimet sipas pagës do i trajtojmë si hajdutët e energjisë elektrike.”