Prokuroria e Posaçme kundër Korrupsionit dhe Krimit të Organizuar (SPAK) po përgatitet të mbyllë hetimet mbi të ashtuquajturën “Afera Partizani,” një rast korrupsioni dhe pastrimi parash që përfshin ish-kryeministrin Sali Berisha dhe dhëndrin e tij, Jamarbër Malltezi. Të dy pritet të përballen me akuza të rënda dhe të merren zyrtarisht të pandehur këtë javë.

Sipas burimeve, Berisha është thirrur të paraqitet në SPAK të mërkurën, më 11 shtator, në orën 12:00, përballë dy prokurorëve të çështjes, Arben Kraja dhe Enkeleda Millonai. Pak orë më vonë, rreth orës 14:00, është planifikuar që edhe Malltezi të paraqitet në SPAK për t’u njohur me akuzat. Aktualisht, Berisha është nën hetim për “Korrupsion pasiv i funksionarëve të lartë shtetërorë ose të zgjedhurve vendorë,” ndërsa Malltezi për të njëjtën akuzë dhe për “Pastrimi i produkteve të veprës penale ose veprimtarisë kriminale.”

Në përgjigje të thirrjes nga SPAK, Berisha ka mobilizuar mbështetësit e tij për të organizuar një protestë në orën 12:00, me qëllim që të ushtrojnë presion mbi organet e drejtësisë. Berisha ka akuzuar SPAK-un se është një “organizatë kriminale” dhe ka bërë thirrje për solidaritet në përkrahje të tij.

Kjo është hera e dytë që Berisha dhe Malltezi thirren nga SPAK, por këtë herë pritet që ata të merren zyrtarisht si të pandehur. Prokuroria po heton gjithashtu një hetim të hollësishëm pasuror që përfshin 25 pasuri të sekuestruara nga familja Berisha dhe Malltezi, çka mund të rëndojë më tej pozitat e tyre ligjore.

Gjithashtu, SPAK ka vënë në hetim ndërtuesin Fatmir Bektashi për “Korrupsion aktiv të funksionarëve të lartë shtetërorë ose të zgjedhurve vendorë” dhe “Pastrimi i produkteve të veprës penale ose veprimtarisë kriminale,” por akuzat ndaj tij nuk janë ende zyrtarizuar.