Kryeministri Edi Rama ka paraqitur sot platformën “Deputeti që Duam”, duke theksuar se qëllimi kryesor i Partisë Socialiste është të arrijë të ketë 1 milion anëtarë aktivë deri në vitin 2030. Rama e paraqiti këtë nismë si një mundësi për të angazhuar një energji të re dhe për të zgjeruar bazën e partisë në përputhje me ambiciet e saj për të ardhmen.

“Sot ne nuk matemi ku ishim, matemi ku duam të jemi në 2030,” tha Rama gjatë prezantimit të platformës. Ai theksoi nevojën për një PS që të jetë pasqyrë e ambicieve të shoqërisë dhe të përfaqësojë të gjitha forcat e progresit në vend, duke përfshirë ato të sipërmarrjes, universitare dhe të punës në fshat.

Rama e shpjegoi se aktualisht, PS ka mbi 700 mijë zgjedhës dhe synon të rritet në 1 milion anëtarë aktivë deri në vitin 2030. Ai theksoi se ky synim është pjesë e një përpjekjeje më të madhe për të ngritur partinë dhe për të përmbushur objektivat e saj për të ardhmen.

“Jemi gati tu presim krah hapur dhe t’ju ofrojmë drejt destinacionit që mendoni për vetën tuaj. Besoj që në fund të këtij procesi mund të kemi qindra aplikantë. Numri i deputetëve të skuadrës së PS është shumë më i vogël se ky numër. Beteja e pranverës së ardhshme dhe përpjekja për të arritur majat deri në 2030 ka nevojë për më shumë njerëz se grupi parlamentar,” përfundoi Rama.