Koordinimi i punës në parlament dhe bashkëpunimi mes palëve ishin temat kryesore të diskutimit në mbledhjen e thirrur nga kryeparlamentarja Elisa Spiropali, ku morën pjesë krerët e katër grupeve parlamentare: Gazment Bardhi, Niko Peleshi, Mesila Doda dhe Agron Duka. Në këtë takim, kryetarja e Kuvendit theksoi rëndësinë e vazhdimit të punës parlamentare pa pengesa dhe i bëri thirrje palëve që të shmangin tensionet dhe bojkotet, duke nënvizuar nevojën për dialog konstruktiv mes mazhorancës dhe opozitës.

Në mbledhje, Agron Duka, kreu i grupit parlamentar “Aleanca për Ndryshim,” u largua i pari, ndërsa diskutimet vazhduan mes Spiropalit dhe tre krerëve të tjerë të grupeve parlamentare. Ky takim vjen në prag të sesionit të ri parlamentar, i cili pritet të jetë i ngarkuar me nisma politike që do të sjellin tensione, përfshirë komisionet hetimore të propozuara nga Partia Demokratike dhe reformat e reja të planifikuara nga Partia Socialiste.

Përbërja e Parlamentit:
-Grupi parlamentar i Partisë Socialiste përbëhet nga 75 deputetë dhe kryesohet nga deputeti Niko Peleshi.
-Grupi parlamentar i Partisë Demokratike përbëhet nga 39 deputetë dhe kryesohet nga deputeti Gazment Bardhi.
-Grupi parlamentar “Demokraci dhe Integrim” përbëhet nga 7 deputetë dhe kryesohet nga deputetja Mesila Doda.
-Grupi parlamentar “Aleanca për Ndryshim” përbëhet nga 7 deputetë dhe kryesohet nga deputeti Agron Duka.

Kjo mbledhje është një përpjekje për të garantuar funksionimin e qetë të parlamentit në një periudhë ku përplasjet politike priten të jenë të shumta.