Ish-kryeministri Sali Berisha kaloi vetëm pak minuta brenda dyerve të Prokurorisë së Posaçme kundër Korrupsionit dhe Krimit të Organizuar (SPAK). Edhe pse ishte thirrur për t’u paraqitur në SPAK në orën 12:00, Berisha fillimisht zgjodhi të takohej me mbështetësit e tij, të cilët ishin mbledhur për të në përputhje me thirrjet e Flamur Nokës, dhe gjithashtu për të komunikuar me gazetarët e pranishëm.

Rreth orës 12:20, Berisha, i shoqëruar nga avokati i tij Genc Gjokutaj, u drejtua nga detektori në hyrjen e SPAK-ut.Brenda Prokurorisë së Posaçme, Berisha dhe Gjokutaj u pritën nga dy prokurorët e çështjes, Arben Kraja dhe Enkelejda Millonai. Biseda mes tyre raportohet të ketë qenë formale, me prokurorët që i dorëzuan Berishës dosjen me akuzat, një dokument voluminoz prej rreth 500 faqesh.

Pas takimit të shkurtër, Berisha u largua nga ambientet e SPAK-ut dhe iu drejtua sërish mediave, ku konfirmoi se tashmë është marrë i pandehur në këtë çështje.