Presidenti turk, Recep Tayyip Erdogan, ka riafirmuar qëndrimin e palëkundur të Turqisë për mbështetjen e integritetit territorial të Ukrainës dhe kundërshtimin e aneksimit të Krimesë nga Rusia në vitin 2014. Në një video-mesazh drejtuar Samitit të Liderëve të Platformës së Krimesë, Erdogan theksoi se kthimi i Krimesë në Ukrainë është një kërkesë e së drejtës ndërkombëtare, duke shtuar se Turqia nuk e kishte njohur kurrë aneksimin e këtij rajoni.

“Mbështetja jonë për integritetin rterritorial, sovranitetin dhe pavarësinë e Ukrainës është e palëkundur. Kthimi i Krimesë në Ukrainë është një kërkesë e ligjit ndërkombëtar,” tha Erdogan, duke përsëritur qëndrimin e qartë të Turqisë në këtë çështje. Ai gjithashtu nënvizoi se aneksimi rus i Krimesë kishte përkeqësuar gjendjen e banorëve të rajonit, veçanërisht të tatarëve të Krimesë, të cilët vazhdojnë të vuajnë për tetë dekada.

Presidenti turk falënderoi presidentin ukrainas Volodymyr Zelensky dhe udhëheqësin e tatarëve të Krimesë, Mustafa Abdulcemil Kirimoglu, për organizimin e samitit, i cili shënonte 80-vjetorin e dëbimit të tatarëve të Krimesë. Erdogan theksoi të drejtën e këtij komuniteti për të jetuar në liri, siguri dhe paqe në atdheun e tyre.

Në përfundim, Erdogan shprehu dëshirën për t’i dhënë fund luftës në Ukrainë përmes një paqeje të drejtë dhe të qëndrueshme, duke u bazuar në integritetin territorial dhe pavarësinë e Ukrainës.