Kreu i Grupit Parlamentar të Partisë Demokratike, Gazment Bardhi, në një fjalim të ashpër në Kuvend, akuzoi kryeministrin Edi Rama për lidhje të qeverisë së tij me krimin e organizuar dhe mungesën e transparencës lidhur me trajtimin e mbetjeve të rrezikshme në Shqipëri. Bardhi vuri në dukje se policia është në dorën e krimit dhe sfidoi Ramën të japë përgjigje për pyetje të rëndësishme mbi prodhimin dhe transportimin e mbetjeve të rrezikshme.
“Pas eksperiencës së tij me inceneratorët, Rama është bërë ekspert edhe për mbetjet e rrezikshme,” deklaroi Bardhi. Ai përmendi raportimet e mediave ndërkombëtare, duke theksuar se televizioni italian RAI ka akuzuar Ramën për lidhje me krimin e organizuar. Bardhi ngriti gjithashtu çështjen e Policisë së Shtetit, duke pyetur retorikisht kryeministrin: “Si quhet drejtori i Policisë në Shkodër? Ti ia ke dorëzuar policinë krimit.”
Bardhi vazhdoi me akuza, duke kujtuar mbrojtjen e mëparshme të Ramës ndaj ish-ministrave të tij, Ilir Beqaj dhe Saimir Tahiri, të cilët sipas tij, dolën të përfshirë në afera të dyshimta. Në përfundim të fjalës së tij, ai i kërkoi kryeministrit të japë përgjigje konkrete mbi prodhimin dhe menaxhimin e mbetjeve të rrezikshme në Shqipëri: “A prodhohen mbetje të rrezikshme në Shqipëri? Ku shkojnë ato? A prodhon Kurum mbetje të rrezikshme dhe përse po kthehen mbetjet e rrezikshme nga Tajlanda?“
