Gjatë diskutimeve në Parlament për projektligjin e Urdhrit të Mjekut, deputetja e PD-së, Albana Vokshi, kritikoi ashpër qeverinë, duke e akuzuar se po ushtron presion mbi Urdhrin e Mjekëve dhe se po i trajton mjekët si armiq. Vokshi denoncoi kushtet e rënda në spitale, duke theksuar se ka mungesa serioze të medikamenteve dhe aparaturave.

Ajo solli në vëmendje se jodi radioaktiv ka munguar për 10 muaj, ndërsa pacientët nuk kanë marrë terapitë e nevojshme për dy vite. Vokshi akuzoi qeverinë se nuk ka marrë asnjë masë për të përmirësuar shërbimet mjekësore, ndërkohë që, sipas saj, ligji i ri për Urdhrin e Mjekëve synon të frikësojë mjekët dhe t’i ndalojë ata të flasin për problemet e sektorit. Deputetja gjithashtu përmendi trajtimin e pabarabartë të mjekëve shqiptarë në krahasim me ata turq në Spitalin e Fierit, ku mjekët turq paguhen dhjetëfish më shumë.

Në përfundim, Vokshi bëri thirrje për një hetim profesional nga SPAK mbi situatën në spitalet shqiptare, veçanërisht në Onkologjik, duke e cilësuar atë si një “krim në masë”.