Rreth orës 14:00 ka përfunduar takimi i deputetëve të Partisë Socialiste në Elbasan, një mbledhje e përqendruar në strategji dhe komunikim. Kryeministri Edi Rama nuk mori pjesë në seancën e diskutimeve, por iu bashkua deputetëve për drekë.

Një nga pikat kryesore të diskutuara në këtë retreat ka qenë strategjia e komunikimit të deputetëve socialistë. Sipas burimeve, Drejtori i Komunikimit, Endri Fuga, u ka kërkuar deputetëve të përmirësojnë praninë e tyre mediatike, duke marrë pjesë më aktive në emisione televizive dhe duke qenë më të pranishëm në rrjetet sociale, përfshirë platformën TikTok. Kjo kërkesë përfshin gjithashtu përmirësimin e përmbajtjes në profilet e tyre në mediat sociale.

Një tjetër temë e rëndësishme ishte rritja e elektoratit gri, i cili përbën një sfidë për PS. Përqendrimi pritet të jetë te votat e diasporës, për të cilat regjistrimi do të fillojë në janar dhe do të përfundojë në mars të vitit të ardhshëm.

Në retreat u diskutua gjithashtu për rolin e Kuvendit në procesin e integrimit në Bashkimin Evropian. Deputetët u informuan për rëndësinë e përafrimit të legjislacionit dhe rritjes së standardeve në funksion të procesit të integrimit. Synimi është mbajtja e Konferencës së tretë Ndërqeveritare me BE në dhjetor 2024, të katërtën në mars 2025 dhe të pestën në dhjetor 2025.