Një 52-vjeçar shqiptar dhe një 37-vjeçare italiane janë vënë në pranga në Bolzano, Itali, pas një operacioni të suksesshëm të policisë. Në automjetin e tyre u zbuluan 15 çanta të mbyllura që përmbanin 15 kilogramë kokainë, zbuluar nga një qen i specializuar i policisë.

Operacioni u zhvillua gjatë natës mes të premtes dhe të shtunës, në një postbllok pranë kabinës së pagesës në autostradën Bolzano Sud. Gjatë kontrolleve, autoritetet konstatuan se shoferi shqiptar kishte precedentë penalë për drogë dhe po shoqërohej nga një shtetase italiane. Hetimet zbuluan gjithashtu se automjeti ishte i regjistruar në emër të një personi të tretë shqiptar, i cili gjithashtu kishte një histori të lidhur me narkotikët.

Droga e sekuestruar ka një vlerë të lartë në tregun e zi, dhe sipas vlerësimeve të Drejtorisë Qendrore të Shërbimeve Kundër Drogës, mund të kapte shifrën e mbi 5 milionë eurove nëse do të hidhej në treg.