Policia e Shtetit ka zbuluar një skemë mashtrimi që synon vjedhjen e të dhënave personale dhe të llogarive të rrjeteve sociale dhe bankare të qytetarëve shqiptarë. Skema është identifikuar nga Sektori për Hetimin e Krimeve Kibernetike gjatë monitorimeve të vazhdueshme, ku u konstatuan mesazhe mashtruese të dërguara drejt numrave të telefonit, të maskuara si mesazhe zyrtare nga kompania Meta Platforms.

Sipas policisë, mesazhet pretendojnë të jenë një kërkesë për konfirmimin e të dhënave të llogarive në Facebook, të lidhura me shërbimin Facebook Ads, duke kërcënuar se nëse përdoruesit nuk veprojnë, llogaritë e tyre do të mbyllen. Qëllimi i këtyre mesazheve është që t’i çojnë përdoruesit drejt faqeve dhe linqeve të rreme, për të marrë në posedim të dhënat dhe llogaritë e tyre në mënyrë të padrejtë.

Sektori për Hetimin e Krimeve Kibernetike ka bërë thirrje për kujdes dhe ka paralajmëruar qytetarët të mos kryejnë asnjë veprim bazuar në këto mesazhe, veçanërisht nga numra të huaj. Për çdo dyshim apo prekje nga kjo skemë, qytetarët janë të ftuar të paraqiten pranë zyrave të sektorit për të denoncuar rastin dhe për të marrë ndihmën e nevojshme.

Njoftimi i Policisë:

“Sektori për Hetimin e Krimeve Kibernetike në DVP Tiranë gjatë monitorimit të burimeve të hapura të informacionit dhe platformave virtuale, ka konstatuar mesazhe të maskuara si ato të kompanisë Meta Platforms, dërguar drejt numrave të telefonit për konfirmimin e të dhënave të llogarive në Facebook, të lidhura me shërbimin Facebook Ads. Në këto mesazhe pretendohet verifikimi i llogarive, në të kundërt llogaria do të mbyllet. Këto mesazhe mashtruese kanë si qëllim marrjen në posedim të llogarive të qytetarëve në mënyrë të padrejtë.”

Policia u bën thirrje qytetarëve që të jenë vigjilentë dhe të shmangin çdo ndërveprim me mesazhe të tilla mashtruese, duke ruajtur sigurinë e të dhënave të tyre personale dhe llogarive online.