Një i ri shqiptar ka rënë në prangat e policisë italiane, pasi u zbulua se po vepronte nën identitetin e një turisti ndërsa kryente krime në territorin italian. Sipas raportimeve, shqiptari jetonte në hotele të ndryshme dhe ishte denoncuar nga qytetarët për lëvizjet e tij të dyshimta.

Forcat e rendit në qytet vunë re lëvizjet e tij dhe e kapën në flagrancë teksa po përpiqej të kalonte disa gardhe. Gjatë kontrollit, atij iu gjetën mbi 2 mijë euro cash dhe dy celularë. Gjithashtu, në një paketë cigaresh, u zbuluan më shumë se 10 gramë kokainë, të ndarë në 18 doza të vogla.

Hetimet vijuan në dhomën e hotelit ku banonte, ku u gjet edhe një telefon tjetër, i cili ndihmoi policinë të gjurmonte një nga bashkëpunëtorët e tij. Autoritetet italiane bënë të ditur se shqiptari përdorte statusin e turistit për të hyrë në Itali, por kryente veprimtari të paligjshme gjatë qëndrimit të tij.

Policia lokale ka kërkuar nga prefektura lëshimin e një urdhri dëbimi për kthimin e tij në Shqipëri.