Apeli i Gjykatës së Posaçme për Korrupsionin dhe Krimin e Organizuar (GJKKO) ka rrëzuar kërkesën e të dënuarit me burgim të përjetshëm, Anterio Kaloshi, për dalje nga regjimi i posaçëm 41-biss. Kaloshi kishte ankimuar vendimin e mëparshëm të Gjykatës së Posaçme të Shkallës së Parë, duke kërkuar shfuqizimin e urdhrit të Ministrit të Drejtësisë që e vendosi atë në këtë regjim të veçantë.

Trupa gjyqësore, e përbërë nga gjyqtarja Nertina Kosova, vendosi më 17 shtator 2024 të lërë në fuqi vendimin nr. 237, të datës 28 qershor 2024, duke konfirmuar që Anterio Kaloshi do të vazhdojë të qëndrojë në regjimin 41-biss në burgun e sigurisë së lartë.

Ky regjim i veçantë aplikohet për të burgosurit me rrezik të lartë dhe kufizon ndjeshëm të drejtat dhe aktivitetet e përditshme në institucionin e vuajtjes së dënimit.