Kompania Meta ka filluar implementimin e një kategorie të re të quajtur “llogari për adoleshentë” në platformën Instagram, me synimin për të rritur kontrollin prindëror mbi aktivitetet e përdoruesve që janë nën moshën 18 vjeç. Kjo veçori e re do t’u mundësojë prindërve të vendosin kufizime mbi përdorimin e aplikacionit nga adoleshentët, duke përfshirë aftësinë për të bllokuar aksesin në orët e vona të natës, monitorimin e mesazheve të dërguara dhe kontrollin e përmbajtjes që fëmijët e tyre shikojnë në platformë.

Kufizimet që mund të vendosin prindërit përfshijnë:
– Vendosjen e një limiti kohor ditor për përdorimin e aplikacionit.
– Bllokimin e përdorimit të Instagramit në periudha të caktuara, si gjatë natës.
– Monitorimin e mesazheve që adoleshentët shkëmbejnë dhe përmbajtjes që ata konsumojnë.

Adoleshentët që regjistrohen për herë të parë në Instagram tashmë janë vendosur automatikisht në cilësimet më të rrepta të privatësisë. Këto cilësime përfshijnë ndalimin e të rriturve që nuk ndiqen nga adoleshentët të dërgojnë mesazhe dhe ndalimin e njoftimeve gjatë natës. Megjithatë, sipas funksionalitetit të ri të “llogarisë për adoleshentët”, përdoruesit nën moshën 16 vjeç do të kenë nevojë për lejen e prindërve për të ndryshuar cilësimet e tyre. Nga ana tjetër, përdoruesit e moshës 16-18 vjeç, që nuk kanë aktivizuar ende këto funksionalitete të reja, do të jenë në gjendje t’i ndryshojnë cilësimet në mënyrë të pavarur.

Sapo një përdorues nën moshën 16 vjeç përpiqet të ndryshojë cilësimet e tij, veçoritë e mbikëqyrjes prindërore do t’u mundësojnë të rriturve të vendosin kufij të rinj kohorë, të bllokojnë aksesin gjatë natës dhe të monitorojnë me kë po shkëmben mesazhe fëmija i tyre. Ndryshimet fillimisht janë zbatuar për përdoruesit e rinj, por Meta ka njoftuar se ato do të aplikohen edhe për llogaritë ekzistuese të adoleshentëve me kalimin e kohës.

Këto masa pritet të rriten dhe të zbatohen edhe në vende të tjera si Britania e Madhe, Shtetet e Bashkuara të Amerikës dhe disa vende të Europës, si pjesë e një përpjekjeje më të gjerë për të rritur sigurinë e adoleshentëve në platformat sociale.