Autoritetet në Shtetet e Bashkuara kanë ngritur akuza të rënda ndaj reperit të njohur Sean “Diddy” Combs, duke zbuluar detaje tronditëse vetëm disa orë pas arrestimit të tij. Prokurori i Nju Jorkut, Damian Williams, njoftoi se Diddy dyshohet se organizonte festa të njohura si “Freak Off,” të cilat zgjatnin disa ditë dhe përfshinin drogë dhe përdorimin me forcë të grave për përmbushjen e kënaqësive seksuale të tij dhe të të ftuarve.

Sipas hetimeve, Diddy shpesh i transportonte vetë gratë, të cilat i trajtonte si skllave seksuale. Gjatë këtyre festave të shthurura, ai i filmonte në akte intime dhe më pas i shantazhonte me publikimin e pamjeve të regjistruara. Festa të tilla përfshinin alkool dhe drogë në sasi të mëdha.

Gjatë bastisjes së vilës së tij, autoritetet amerikane sekuestruan armë zjarri me numra serialë të fshirë, materiale video të regjistrimeve nga festat, dhe mijëra shishe me “Baby Oil” që dyshohet se përdorej gjatë aktiviteteve erotike. Prokurori Williams njoftoi se Diddy nuk vepronte vetëm, por mbështetej nga një rrjet bashkëpunëtorësh, disa prej të cilëve i korruptonte ose shantazhonte për të bashkëpunuar.

Për më tepër, akuzat përfshijnë raste të shumta të dhunës fizike ndaj grave, të cilat shpesh kërkonin javë për t’u shëruar nga lëndimet e marra. Autoritetet njoftojnë se hetimet vazhdojnë për të zbuluar përmasat e plota dhe kompleksitetin e rrjetit të tij. Diddy është akuzuar gjithashtu për prostitucion dhe shantazh, me hetime që pritet të thellohen.