Gjykata e Shkallës së Parë e Juridiksionit të Përgjithshëm Shkodër ka vendosur sot (18 shtator) masën e sigurisë “arrest me burg” për Lulzim Rakaj, autorin e plagosjes së dyfishtë të ndodhur më 15 shtator në Malësinë e Madhe. Pala mbrojtëse kishte kërkuar masën “arrest në shtëpi”, por kjo kërkesë nuk u mor parasysh nga gjyqtari Albert Keraj, i cili pranoi kërkesën e prokurores Elsa Gjeni për të mbajtur Rakajn në “arrest me burg”.
Gjatë seancës, Rakaj pretendoi se kishte qëlluar në kushtet e vetëmbrojtjes, pasi dyshonte se Besmir Çofi dhe Avenir Hasanaj kishin armë me vete. “Më ka ruajtur Zoti që kam shpëtuar nga ata. Më ka falur Zoti”, ka deklaruar ai para gjykatës.
Plagosja e Dyfishtë
Ngjarja ndodhi më 15 shtator 2024, rreth orës 09:45, kur Besmir Çofi dhe Avenir Hasanaj u qëlluan me armë zjarri në hyrje të një lokali në fshatin Vrakë të Malësisë së Madhe. Pas një ndjekjeje prej 4 orësh, forcat speciale të FNSH arrestuan Lulzim Rakajn, teksa ai po tentonte të largohej me bashkëshorten e tij në makinë.
Njëri nga të plagosurit u qëllua në brinjë, ndërsa tjetri në këmbë.
