Prokuroria e Posaçme (SPAK) ka nisur një hetim për dekonspirimin e operacionit të datës 31 korrik, që synonte goditjen e bandës së vëllezërve Franc dhe Hajdar Çopja në Elbasan. Ky operacion rezultoi i suksesshëm vetëm për ekzekutimin e 13 urdhërarresteve nga gjithsej 33 të lëshuara me vendim të Gjykatës së Posaçme (GJKKO).

SPAK ka vendosur policinë nën hetim, dhe disa prej drejtuesve kryesorë të policisë, të cilët kishin dijeni për operacionin, janë marrë në pyetje. Gjatë muajit gusht është marrë në pyetje edhe ish-Drejtori i Përgjithshëm i Policisë së Shtetit, Muhamet Rrumbullaku. Ndër të tjerë që janë thirrur nga hetuesit për t’u marrë në pyetje janë: Vilson Bala, drejtori i Operacionales; Neritan Nallbati, drejtori i Policisë Kriminale; dhe Edmond Rizai, drejtori i Hetimit në Policinë e Shtetit.

Një nga të pyeturit është edhe drejtori i Policisë së Elbasanit, Ilir Proda, të cilit i është sekuestruar telefoni si pjesë e hetimit. Proda gjithashtu është në garë për postin e Drejtorit të Përgjithshëm të Policisë së Shtetit pas dorëheqjes së Rrumbullakut. Në hetim janë vendosur edhe 10 agjentë policie dhe hetues të BKH-së.

Nga 33 urdhërarreste të miratuara nga SPAK, gjatë operacionit u arrit të ekzekutoheshin vetëm 13. Dy prej të arrestuarve ishin ndaluar më herët për vepra të tjera penale, ndërsa disa nga anëtarët e bandës kriminale, të cilët mendohet të jenë ende në Shqipëri, janë arratisur, duke ngritur dyshime se janë informuar për operacionin.

Hetimi ndaj vëllezërve Çopja ka nisur që në vitin 2022, bazuar në dëshmitë e bashkëpunëtorëve të drejtësisë, Erion Alibej dhe Nuredin Dumani. Ky hetim ka zbardhur disa vrasje, atentate dhe grabitje që lidhen me përplasjet mes grupeve kriminale për sundimin e trafikut të kokainës në Europë. Grupi Çopja është akuzuar për përfshirjen në këto aktivitete të dhunshme, ndërkohë që Franc dhe Hajdar Çopja janë ende në arrati.