Policia e Tiranës ka arrestuar tre të rinj në kuadër të operacionit “Falco”, të akuzuar për vjedhje në një banesë në zonën e Astirit, ku kanë marrë çanta dhe aksesorë me vlerë rreth 15 mijë euro. Të arrestuarit janë Leonard Balla (25 vjeç), Denis Myftari (23 vjeç) dhe Ervin Xaka (21 vjeç), të tre banues në Fushë-Krujë. Gjithashtu, policia ka vënë në pranga dhe Florjan Çelën (34 vjeç), pronar i një argjendarie, i cili dyshohet se ka blerë sendet e vjedhura.

Sipas hetimeve, ngjarja ka ndodhur më 13 shtator 2024, kur një nga të arrestuarit, Leonard Balla, ka hyrë në një banesë dhe ka vjedhur sende me vlerë. Denis Myftari ka ndihmuar duke ruajtur vendin, ndërsa Ervin Xaka ka siguruar largimin e tyre me makinë. Një pjesë e sendeve të vjedhura u gjetën në dyqanin e Florjan Çelës dhe u sekuestruan si prova materiale. Materialet i janë dorëzuar Prokurorisë për ndjekje të mëtejshme.