Policia italiane ka finalizuar një operacion të rëndësishëm në provincat e Monzës dhe Milanos, duke sekuestruar 93 kilogramë kokainë të pastër. Një shqiptar 31-vjeçar është arrestuar, i dyshuar për përfshirje në një rrjet të organizuar kriminal të trafikut të drogës. Vlera e lëndës narkotike në tregun e pakicës vlerësohet të jetë rreth 4 milionë euro nëse do të shitej në doza.

Operacioni, i cili u krye në një apartament në Seregno, zona e Brianza, u konfirmua më 17 shtator. Ndërhyrja erdhi pas një hetimi për trafikun dhe shpërndarjen e drogës në sheshet e provincave Monza dhe Milano, dhe u koordinua nga Prokuroria e Monzës.

Operacioni u zhvillua nga Drejtoria e Policisë së Milanos gjatë natës mes të dielës dhe të hënës. Ndërkohë, hetimet janë ende në zhvillim dhe autoritetet italiane janë në kërkim të drejtuesve të mundshëm të kartelit të drogës me të cilin i arrestuari ka pasur lidhje. Emri i të dyshuarit nuk është publikuar për shkak të vazhdimësisë së operacionit.