Rreth 500 anëtarë të Hezbollahut raportohet se kanë humbur shikimin pas shpërthimeve masive që ndodhën më 17 Shtator në Liban dhe Siri. Aleatët e Hezbollahut në Siri janë goditur gjithashtu nga sulmet, duke përfshirë edhe ambasadorin iranian në Liban, i cili po ashtu ka humbur shikimin. Bejruti ka akuzuar Izraelin për këto shpërthime, ndërsa Izraeli nuk ka bërë komente zyrtare. Burime amerikane raportojnë se Izraeli ka vendosur të aktivizojë shpërthimet e pajisjeve pager më herët se sa ishte planifikuar, nga frika se Hezbollahu do të zbulonte operacionin, shkruan “La Repubblica”.
Në momentin fatal, një sinjal zanor paralajmëroi shpërthimin, duke shkaktuar një valë shpërthimesh që rezultuan në një bilanc të rëndë viktimash. Dëshmitarët kanë rrëfyer për media italiane dhe ndërkombëtare se fillimisht pati një sinjal akustik, dhe më pas një shpërthim i fuqishëm që deri më tani ka vrarë nga 9 deri në 18 persona (shifra jo ende zyrtare) dhe plagosur deri në 4 mijë persona, nga të cilët 200 janë në gjendje të rëndë.
Një fjalim i rëndësishëm pritet nga udhëheqësi i Hezbollahut, Hassan Nasrallah, i cili do të flasë më 19 Shtator në orën 17:00 me orën lokale të Libanit, për të adresuar këto ngjarje. Fjalimi vjen pas shpërthimeve të pajisjeve pager që kanë sjellë vdekje dhe lëndime të mëdha në radhët e organizatës. Hezbollahu e ka fajësuar Izraelin për këto shpërthime.
Sipas raportimeve të “New York Times”, pajisjet pager në posedim të anëtarëve të Hezbollahut lëshuan një sinjal zanor për disa sekonda para se të shpërthenin. Ky sinjal u perceptua nga pronarët e pajisjeve, të cilët u përpoqën t’i lexonin mesazhet në to, duke mbajtur pajisjet pranë fytyrës. Në mënyrë të veçantë, pageri i ambasadorit iranian në Liban, Mojtaba Amani, lëshoi një sinjal të tillë para se të shpërthente, duke e plagosur rëndë diplomatin iranian.
Zëdhënësi i Ministrisë së Jashtme iraniane, Nasser Kanaani, e cilësoi këtë sulm si një akt gjenocidi, duke fajësuar Izraelin për vendosjen e paqes dhe sigurisë në rajon në rrezik. Ai bëri thirrje për një reagim urgjent ndërkombëtar. “Izraeli po vendos edhe një herë në rrezik paqen dhe sigurinë e rajonit,” tha ai në një deklaratë për median.
Ambasadori iranian, Mojtaba Amani, humbi një sy në këtë sulm, ndërsa syri tjetër është gjithashtu në rrezik të madh, sipas informacioneve nga anëtarë të Gardës Revolucionare të Iranit. Amani është dërguar me urgjencë në Teheran për trajtim të mëtejshëm.
Një raport nga “Associated Press” konfirmon se Izraeli informoi Shtetet e Bashkuara për operacionin pas përfundimit të tij. Pajisjet pager të shpërthyera në Liban dhe Siri ishin shpërndarë më herët për anëtarët e Hezbollahut dhe aleatët e tij në këto zona, si pjesë e një sulmi të mirëmenduar dhe të koordinuar. Ndërsa Hezbollahu ka fajësuar drejtpërdrejt Izraelin, ushtria izraelite ka refuzuar të komentojë për këto ngjarje.
