Udhëheqës nga e gjithë bota, përfshirë kryeministrin shqiptar Edi Rama, do të marrin pjesë në takimin vjetor të Kombeve të Bashkuara, që nis punimet këtë të dielë në Nju Jork. Në këtë Asamble do të trajtohen disa nga çështjet më të rëndësishme dhe delikate që prekin botën sot, duke përfshirë luftërat në Gazë, Sudan dhe Ukrainë.

Përveç Asamblesë së Përgjithshme, do të zhvillohet edhe një samit i posaçëm për të ardhmen, i cili synon reformimin e sistemit të Kombeve të Bashkuara për të përballuar sfidat e reja globale, si ndryshimet klimatike dhe zhvillimet në fushën e inteligjencës artificiale.

Kryeministri Rama, përveç takimeve me homologët e tij, do të marrë pjesë edhe në një takim të liderëve të rajonit, i organizuar nga shefi i diplomacisë evropiane në largim, Josep Borrell. Gjithashtu, ai do të zhvillojë një takim të veçantë me presidenten e saporizgjedhur të Parlamentit Europian, Roberta Metsola. Pritet që Rama të kthehet në Shqipëri më 28 shtator.

Ndër pjesëmarrësit në këtë takim do të jenë edhe presidenti ukrainas Volodymyr Zelenskyy, kryeministri izraelit Benjamin Netanyahu dhe presidenti palestinez Mahmoud Abbas. Përpjekjet për paqe mbeten ende larg, ndërsa lufta në Ukrainë vazhdon që prej më shumë se dy vitesh e gjysmë. Zelenskyy pritet të kërkojë mbështetje të shtuar ushtarake për Ukrainën, përfshirë armë me rreze të gjatë veprimi. Presidenti rus Vladimir Putin nuk do të jetë i pranishëm, por vendin e tij do ta përfaqësojë ministri i Jashtëm, Sergey Lavrov.

Ky takim ka një rëndësi të veçantë për presidentin amerikan Joe Biden, pasi mund të jetë i fundit në OKB gjatë mandatit të tij. Megjithatë, pas dy përpjekjeve për atentat ndaj ish-presidentit Donald Trump, ngrihet pyetja nëse SHBA-ja do të arrijë të garantojë sigurinë e më shumë se 130 liderëve botërorë që do të marrin pjesë në këtë ngjarje madhore në Nju Jork. Masat e sigurisë janë të rrepta, me një prani të madhe policore dhe mbështetje të Shërbimit Sekret nga Sigurimi Diplomatik i Kombeve të Bashkuara.