Udhëheqës nga mbarë bota, përfshirë liderë të Bashkimit Europian dhe Ballkanit Perëndimor, do të marrin pjesë në sesionin e 79-të të Asamblesë së Përgjithshme të Kombeve të Bashkuara që fillon punimet këtë të diel në Nju Jork. Në mesin e tyre do të jetë edhe kryeministri i Shqipërisë, Edi Rama.

Fokusi kryesor i këtij sesioni do të jenë krizat dhe konfliktet globale, veçanërisht luftërat në Gaza, Ukrainë dhe Sudan. Axhenda e Asamblesë përfshin një seri takimesh të rëndësishme, duke filluar me samitin e së ardhmes dhe vijuar për disa ditë me diskutime për çështje globale.

Një takim i veçantë është parashikuar midis Shefit të Politikës së Jashtme dhe Sigurisë së Bashkimit Evropian, Josep Borrell, dhe gjashtë liderëve të Ballkanit Perëndimor. Në sesionin e OKB-së pritet të marrë pjesë edhe një delegacion i nivelit të lartë nga Bashkimi Evropian, përfshirë presidenten e Komisionit Evropian, Ursula von der Leyen.

Komisioni Evropian ka theksuar pesë prioritete kryesore për këtë sesion: promovimi i një rendi ndërkombëtar të bazuar në rregulla, mbështetja për paqen dhe sigurinë, avancimi i zhvillimit të qëndrueshëm, adresimi i krizës planetare, dhe nxitja e besimit nëpërmjet një sistemi shumëpalësh më efektiv.

Sekretari i Përgjithshëm i OKB-së, Antonio Guterres, ka theksuar rëndësinë e multilateralizmit në zgjidhjen e problemeve globale, duke shtuar se “nuk mund t’i zgjidhim problemet e shekullit të 21-të me mjetet e shekullit të 20-të.”