Një ngjarje tragjike ndodhi në fshatin Nikoliq të Hasit, ku humbën jetën Fatime Lushi, 82 vjeçe, dhe i biri i saj, Rexh Lushi, 57 vjeç, si pasojë e flakëve që përpinë banesën e tyre gjatë natës. Vetëm bashkëshortja e Rexhës arriti të shpëtojë nga zjarri.

Kryetari i Bashkisë së Hasit, Miftar Dauti, ka deklaruar se ndihma nga Drejtoria e Përgjithshme e Emergjencave Civile, qeveria dhe bashkia kanë qenë të menjëhershme në mbështetje të familjes së prekur. Ai sqaroi se ndihmat nga emergjencat civile kanë mbërritur në vendngjarje, ndërsa qeveria ka vendosur të japë një ndihmë prej 500 mijë lekësh për viktimat. Bashkia e Hasit do të mbulojë gjithashtu shpenzimet e varrimit.

Dauti kujtoi zjarrin e tmerrshëm që përpiu banesën në orët e para të mëngjesit, rreth orës 02:00, duke shtuar se, edhe pse shkaku ende nuk është konfirmuar plotësisht, dyshimet kryesore janë mbi një shkëndijë elektrike, me shumë gjasë nga një rezistencë e lënë ndezur nga e moshuara. “100% them se ka qenë shkëndijë elektrike,” deklaroi Dauti, duke shtuar se një rezistencë e gjetur në vendin e ngjarjes e mbështet këtë teori.