Gjykata e Apelit në Tiranë ka vendosur të lirojë nga paraburgimi shtetasin italian Salvatore Di Tella, i cili akuzohet për vrasje nga pakujdesia, pas një aksidenti tragjik që ndodhi më 19 gusht në plazhin e Velipojës. Di Tella shkaktoi aksidentalisht humbjen e jetës së kunatit të tij, 19-vjeçarit Nicola Loro, gjatë një përplasjeje me Jet Ski, teksa po bënin manovra të rrezikshme në ujë.

Në fillim, Gjykata e Shkallës së Parë në Shkodër i caktoi Di Tellës masën e sigurisë “arrest me burg” për 60 ditë, por Gjykata e Apelit e ndryshoi këtë vendim duke e zëvendësuar me masën “garanci pasurore” dhe “detyrim paraqitje”. Garancia pasurore e vendosur për lirimin e tij është në vlerën e 10 milion lekëve të vjetra.

Gjatë kësaj periudhe, janë dorëzuar dy raporte ekspertize: njëri mjeko-ligjor dhe tjetri teknik, që kanë të bëjnë me incidentin dhe Jet Ski-t e përfshirë. Salvatore Di Tella nuk ka bërë deklarata të reja në gjykatë, duke qëndruar në ato që ka dhënë më parë në polici. Në rrëfimin e tij, ai shpjegoi se pas përplasjes së tyre në det, një dallgë e madhe e hodhi Nicola Loro në ujë, duke shkaktuar tragjedinë.

Avokati mbrojtës i Di Tellës, Arbër Rraja, kërkoi masën e sigurisë “detyrim paraqitje” me garanci pasurore ose alternativën e “arrestit shtëpiak” në banesën e personit që e kishte ftuar atë dhe të fejuarën e tij në Shqipëri për një ceremoni martesore. Gjykata vendosi të pranojë kërkesën për lirimin me garanci pasurore.

Gjatë seancës, avokati mbrojtës prezantoi 20 fotografi që tregonin afërsinë familjare dhe miqësinë mes viktimës dhe të dyshuarit, duke e theksuar se bëhet fjalë për një fatkeqësi familjare. Në sallën e gjyqit ishin të pranishëm edhe përfaqësues të Ambasadës Italiane në Shqipëri. Të rinjtë kishin ardhur në Shqipëri për pushime, por ngjarja përfundoi tragjikisht me vdekjen e Nicola Loro.