Dalin detaje të reja në lidhje me një ngjarje të rëndë ku janë të përfshirë tre efektivë të repartit “Shqiponja” të Policisë së Tiranës. Incidenti ndodhi gjatë një ndalimi rutinë në rrugën Tiranë-Fushë Krujë, kur policët kanë ndaluar një automjet për kontroll dokumentesh. Qytetari, i cili ndodhej në automjet, u ka dorëzuar dokumentet efektivëve dhe u ka kërkuar që të largohej sa më shpejt, duke deklaruar se kishte fëmijën të shtruar në spital. Megjithatë, efektivët nuk i kanë dhënë leje për të vazhduar rrugën.

Në kushtet e tensionit të krijuar, qytetari, pasi u ka dorëzuar dokumentet, është larguar me shpejtësi nga vendi i ndalimit. Polici Rezart Berberi, duke reaguar ndaj largimit, ka nxjerrë pistoletën e shërbimit dhe ka qëlluar dy herë në drejtim të automjetit, duke goditur makinën në pjesën e pasme.

Ngjarja fillimisht është mbajtur e fshehtë nga efektivët e përfshirë, të cilët dyshohet se kanë ndërhyrë për të prishur provat në vendngjarje dhe kanë larguar gëzhojat. Qytetari më vonë ka bërë një kallëzim penal pranë Prokurorisë së Tiranës, e cila ka nisur hetimet dhe ka vërtetuar rrethanat e incidentit. Dy efektivët, Elton Dokollari dhe Florian Zeneli, janë vendosur nën masën e “detyrimit për paraqitje”, duke pretenduar se kanë vepruar në kushtet e vetëmbrojtjes, pasi sipas tyre, qytetari ka tentuar t’i përplasë me makinën e tij.

Ndërkohë, polici Rezart Berberi, i cili qëlloi me armë, vijon të jetë në kërkim. Ai është nën akuzë për “vrasje me dashje të mbetur në tentativë”, “falsifikim dokumentesh”, dhe “kallëzim të rremë”. Hetimet janë ende në zhvillim dhe autoritetet pritet të zbardhin më shumë detaje rreth kësaj ngjarjeje.