Kryetari i Partisë Demokratike, Sali Berisha, gjatë fjalimit të tij në protestën maratonë të organizuar te ‘Rruga e Shpresës’, akuzoi Kryeministrin Edi Rama për rritje të jashtëzakonshme të pasurisë personale, ndërkohë që qytetarët shqiptarë vazhdojnë të kenë pagat më të ulëta në rajon. Berisha theksoi se ndërsa rritja e pagave është përmendur nga qeveria si një sukses, diferenca me vendet e tjera të rajonit mbetet e njëjtë si më parë.
Fjala e Berishës:
“Po, po, Edi Rama ka rritur pasuritë e tij me dhjetëra herë, ndërsa qytetarët vazhdojnë të mbeten në varfëri. Belinda Balluku dhe Erion Veliaj, së bashku me një rreth të ngushtë të pasuruar, kanë përfituar nga kjo situatë. Ndërkohë, qytetarët shqiptarë nuk kanë përfituar asgjë nga rritja e prodhimit të brendshëm bruto (GDP). Çfarë përfituat ju nga kjo rritje? Vetëm një ndëshkim!
Ndëshkimi ka ardhur në formën e rritjes së tmerrshme të çmimeve të ushqimeve dhe shpenzimeve të tjera. Çmimet kanë arritur nivele marramendëse, që variojnë nga 10% deri në 250% më të larta sesa mesatarja në Bashkimin Evropian. Kjo situatë është parajsë për qeveritarët dhe oligarkët, por ndëshkim dhe varfërim për qytetarët.
Sot, Edi Rama mburret se një mësues merr 950 euro, por realiteti është se ne ende kemi rrogat më të ulëta në rajon. 11 vite më parë, ishim në krye të rajonit për pagat. Rrogat ishin të larta për qytetarët, jo për oligarkët dhe politikanët.”
Berisha përfundoi duke theksuar se diferenca e pagave me vendet e rajonit ka mbetur e njëjtë, edhe pas pretendimeve të qeverisë për rritje të pagave, duke argumentuar se Shqipëria ka ngecur ekonomikisht përballë përparimit të vendeve fqinje.
