Agjencia Shtetërore e Kadastrës ka shkarkuar menjëherë zyrtarët e Kadastrës së Lezhës pas denoncimeve të publikuara në një emision investigativ, ku u zbulua se ata vepronin nën presionin e familjarëve të Ardjan Nikulajt, i cili u vra në Shëngjin. Mbrëmjen e djeshme, qytetarët Arben Staka dhe Luigj Leka paraqitën ankesat e tyre për një pronë që kishin blerë, por kishin hasur probleme në Kadastrën e Lezhës dhe kishin bërë kallëzim në polici.

Pas kallëzimit, Arben Staka u telefonua nga Vera Nikulaj, e veja e Ardjan Nikulajt, e cila e ftoi atë për të biseduar në lokalin e saj. Në këto ambiente, Arbeni takoi drejtorin e Kadastrës, Aris Mema, dhe ish-drejtorin Gentian Malotaj, të cilët i kërkuan që të tërhiqte kallëzimin, duke e kërcënuar me pasoja nga fëmijët dhe familjarët e të ndjerit. Madje, sipas denoncimit të Stakës, Vera Nikulaj i ofroi 100 mijë euro si garanci për të rregulluar problemin, vetëm që ai të tërhiqte kallëzimin.

Në reagimin e saj, Agjencia Shtetërore e Kadastrës dënoi ashpër rastin e denoncuar nga emisioni investigativ, duke theksuar se institucionet e saj distancohen plotësisht nga veprimet e nëpunësve të përfshirë, të cilët janë shkarkuar menjëherë nga detyra. ASHK inkurajoi organet ligjzbatuese të ndërmarrin masat e nevojshme dhe të ndjekin me përpikmëri procedurat ligjore për të zbardhur plotësisht çështjen, duke sjellë para drejtësisë çdo person të përfshirë në këtë veprimtari të paligjshme. Agjencia theksoi se mbetet e angazhuar në luftën kundër korrupsionit dhe abuzimeve, duke siguruar transparencë dhe integritet në shërbimet e saj për qytetarët.