Sali Berisha ka reaguar fuqishëm ndaj arrestimit të deputetit të Partisë Demokratike, Ervin Salianji, duke e cilësuar vendimin e Apelit si antikushtetues dhe antiligjor. Ai theksoi se arrestimi i Salianjit ndodhi brenda një kohe shumë të shkurtër pas shpalljes së vendimit dhe e konsideroi këtë si një urdhër të drejtpërdrejtë të Kryeministrit Edi Rama.

Berisha tha: “Mbrëmë, nënkryetari i grupit parlamentar të PD-së, një deputet i ri dhe guximtar, i cili nuk ka mbajtur poste të rëndësishme zyrtare, përveç detyrës fisnike që i është besuar nga qytetarët dhe Partia Demokratike, u burgos me urdhër të Edi Ramës. Kjo ndodhi menjëherë pas vendimit antikushtetues dhe antiligjor të një gjykate që është plotësisht e kontrolluar nga Rama.”

Sipas Berishës, arrestimi i Salianjit nuk lidhet vetëm me një vendim gjykate, por është një akt hakmarrjeje politike ndaj dikujt që ka pasur guximin të flasë për atë që Berisha e quan “vëllazërinë famëkeqe Xhafa” dhe lidhjet e tyre me pushtetin. Ai vuri në dukje se kjo situatë është e rëndë jo vetëm për opozitën, por për të gjithë shqiptarët që besojnë tek ndershmëria dhe e drejta.

“Është një natë e zezë për të gjithë shqiptarët që besojnë në të vërtetën dhe që luftojnë me ndershmëri për të rritur fëmijët e tyre,” tha Berisha. Ai shtoi se lidhjet e pushtetit me krimin dhe trafikun e drogës janë një kërcënim serioz për vendin dhe për të ardhmen e tij.