Klajdi Kondo, 34-vjeçari i akuzuar për përfshirje në një grup të strukturuar kriminal që transportonte emigrantë drejt shteteve të Bashkimit Evropian, është ekstraduar nga Suedia në Shqipëri. Grupi kriminal, ku Kondo dyshohet se ishte pjesë, organizoi transportin e paligjshëm të emigrantëve me skaf gjatë viteve 2020 dhe 2021.

Sipas njoftimit të Policisë, operacioni “Para drejtësisë” u finalizua në bashkëpunim mes Interpol Tiranës dhe autoriteteve suedeze, duke mundësuar ekstradimin e Kondos. Ai ishte shpallur në kërkim ndërkombëtar dhe u arrestua në Suedi, ku më pas u nis drejt Shqipërisë.

Në vitin 2022, Gjykata e Posaçme e Shkallës së Parë për Korrupsionin dhe Krimin e Organizuar kishte caktuar masën e sigurisë “Arrest në burg” për Klajdi Kondon, për veprën penale “Ndihma për kalim të paligjshëm të kufijve” në kuadrin e grupit kriminal. Ai akuzohet për transportin e emigrantëve sirianë, egjiptianë dhe iranianë drejt Italisë dhe vendeve të tjera evropiane, kundrejt përfitimeve financiare.

Operacioni vjen si pjesë e përpjekjeve të vazhdueshme të autoriteteve shqiptare për të luftuar trafikun e paligjshëm të emigrantëve dhe krimin e organizuar.