Është bërë publike dosja e plotë hetimore lidhur me ngjarjen e rëndë në Sarandë, ku në muajin qershor humbi jetën Armandi Nelaj, ndërsa tentonte të vendoste eksploziv në një anije udhëtarësh. Sipas hetimeve, Nelaj dhe bashkëpunëtori i tij, Erdion Muho, ishin përfshirë në një plan për të sabotuar tragetin “Kristi”, pjesë e linjës Sarandë-Korfuz. Ngjarja u zhvillua mbrëmjen e 24 qershorit në portin e Sarandës, ku Nelaj humbi jetën gjatë tentativës për të vendosur eksplozivin.

Sipas prokurorisë, dy ditë përpara ngjarjes, Nelaj dhe Muho janë fiksuar nga kamerat e sigurisë duke blerë pajisje zhytjeje dhe pajisje të tjera të nevojshme për realizimin e sabotazhit. Dosja përmban prova të rëndësishme, përfshirë pamjet filmike dhe dëshmitë e dy turistëve të huaj, një belg dhe një anglez, të cilët ishin ndër të fundit që komunikuan me Nelajn përpara shpërthimit.

Turistët panë Nelajn në një varkë pa ndriçim teksa tërhiqte dy çanta të zeza në ujë. Ai i kishte paralajmëruar të largoheshin dhe vetëm pak sekonda më vonë, ata dëgjuan shpërthimin fatal. Pas njoftimit të policisë kufitare, trupi i pajetë i Nelajt u nxor në breg bashkë me varkën e shkatërruar.

Hetimet tregojnë se motivi i kësaj tentative ishte konkurrenca për linjën detare Sarandë-Korfuz, ku kompania e prekur nga sabotimi ishte Finikas Lines. Në vitin 2020, anijet e kësaj kompanie janë goditur edhe më parë, përfshirë një incident ku një traget u qëllua me armë nga toka në zonën e Ksamilit.

Erdion Muho, bashkëpunëtori i arrestuar i Nelajt, u kap pas një përpjekjeje për t’u larguar drejt Greqisë, duke u përpjekur të krijonte një alibi për veten. Ai kishte ndërruar aparatin celular, por hetuesit arritën të rikuperojnë komunikimet e tij, të cilat përfshinin diskutime dhe informacione për kompaninë Finikas.

Gjykata e Apelit ka refuzuar lirimin me garanci pasurore të Muhos, duke e mbajtur në burg ndërkohë që hetimet po zgjerohen për të përfshirë edhe prova të tjera të mundshme mbi implikimin e tij dhe personave të tjerë të përfshirë në ngjarje.

Prokuroria e Sarandës pritet të vazhdojë hetimet për këtë rast, që përfshin jo vetëm tentativën për sabotimin e linjës detare, por edhe për të ndriçuar lidhjet e mundshme me sulme të tjera të mëparshme ndaj Finikas Lines.