Kryetari i Grupit Parlamentar të Partisë Socialiste, Niko Peleshi, ka dënuar ashpër aktet e sotme të opozitës në Parlament, ku deputetët e opozitës dogjën karriget e tyre në oborrin e Kuvendit. Në një postim në rrjetet sociale, Peleshi theksoi se ky veprim nuk përfaqëson një aksion politik opozitar, por është një manifestim i qartë i dhunës së papranueshme.

Ai shprehet se deputetët e mazhorancës janë në Parlament për të debatuar me fjalë, dhe jo për t’u përleshur me karrige. “Aktet e sotme të dhunës në Parlamentin e Shqipërisë nuk përfaqësojnë thjesht një aksion politik nga opozita, por janë një manifestim i qartë i dhunës së papranueshme, që tejkalon çdo veprim radikal të mëparshëm. Djegia e karrigeve është simbol i djegies së besimit të qytetarëve, pikërisht në ditët kur Shqipëria ka nevojë më shumë se kurrë për bashkimin e forcave në rrugën e hapur drejt Bashkimit Europian,” thekson ai.

Peleshi nënvizon se sot pritet nga të gjithë deputetët përgjegjshmëri, maturi politike dhe përkushtim ndaj reformave që përqafojnë vlerat europiane. Ai thekson se seanca parlamentare duhet të jetë një tempull i etikës dhe respektimit të ligjit, dhe jo një skenë ku ligji shkelet dhunshëm.

“Deputetët tanë nuk janë aty për t’u përleshur me këmbë karrigesh, por për të debatuar me fjalë. Një deputet nuk mund të tolerohet asnjë veprim që i ndalohet qytetarit të zakonshëm. Aq më tepër dhuna,” shkruan Peleshi, duke theksuar rëndësinë e respektit dhe etikës në institucione.