Kombëtarja e Shqipërisë në futboll ka dy ndeshje të rëndësishme gjatë këtij tetori në Grupin B1 të Ligës së Kombeve. Më 11 tetor, kuqezinjtë do të udhëtojnë në Pragë për t’u përballur me Çekinë, ndërsa më 14 tetor do të ndeshen sërish në udhëtim, këtë herë kundër Gjeorgjisë, e cila na mposhti në “Air Albania” një muaj më parë.

Trajneri Sylvinho po punon për të finalizuar listën e lojtarëve që do të grumbullohen për këto ndeshje, dhe një emër i ri që pritet të ketë një vend në ekipin e parë është ai i Adrion Pajazitin. Kapiteni i ekipit U-21 ka pasur një performancë të shkëlqyer, duke luajtur 13 ndeshje dhe duke shënuar tetë gola me Shpresat, prandaj përfshirja e tij në ekipin A nuk është një surprizë, sidomos duke marrë parasysh përvojën e tij në klubin Gorica në Kroaci.

Mungesa e Medon Berishës për shkak të lëndimit e ka detyruar trajnerin që të thërrasë një mesfushor të ri, i cili shihet si e ardhmja e Kombëtares. Gjithashtu, Ernest Muçi, sulmuesi i Besiktas, ka marrë ftesën për këto dy ndeshje pas mungesës në grumbullimin e parë.

Në dy ndeshjet e para të Ligës së Kombeve, ekipi shqiptar ka regjistruar një fitore kundër Ukrainës dhe një humbje përballë Gjeorgjisë, duke grumbulluar në total tri pikë dhe duke u renditur në vendin e dytë, pas Gjeorgjisë, e cila ka 6 pikë.