Vlora është qyteti më i goditur nga moti i keq që ka përfshirë Shqipërinë sot, duke sjellë stuhi të fuqishme, erëra të forta dhe reshje të dendura shiu. Situata e krijuar ka sjellë përmbytje të mëdha dhe ndërprerje të energjisë elektrike, ndërsa mbi 30 familje janë evakuuar nga shtëpitë e tyre.

Kryebashkiaku i Vlorës, Ermal Dredha, u shpreh për mediat se reshjet e pandërprera, që zgjatën mbi dy orë e gjysmë, shkaktuan daljen nga shtrati të kanalit të ujërave të larta, duke përmbytur pjesë të mëdha të qytetit. “Situata është kritike, prurjet e reshjeve kanë qenë tepër të dendura dhe ne po përpiqemi të menaxhojmë situatën në terren,” tha Dredha, ndërsa kërkoi ndihmë nga Ministria e Mbrojtjes dhe Drejtoria e Përgjithshme e Emergjencave Civile.

Përveç përmbytjeve, qyteti bregdetar është përballur edhe me mungesë energjie dhe ndërprerje të furnizimit me ujë. Për shkak të përmbytjes së qytetit, qytetarët kanë vështirësi në pompimin e ujit jashtë banesave të tyre. Ndërkohë, Operatori i Sistemit të Shpërndarjes së Energjisë (OSSH) reagoi, duke shpjeguar se është ndërprerë energjia në disa zona të Vlorës për të parandaluar ndonjë tragjedi të mundshme nga kontakti me rrymën elektrike në zonat e përmbytura.

OSSH sqaroi gjithashtu se energjia do të mbetet e ndërprerë deri në kontrollimin e çdo kabine elektrike të prekur nga përmbytjet. “Masat e sigurisë do të vijojnë deri në përmirësimin e situatës dhe kërkojmë mirëkuptim nga qytetarët,” thuhet në deklaratën e OSSH-së.

Ndërkohë, ekipet e gatishmërisë janë në terren duke punuar për të rikthyer sa më shpejt energjinë dhe për të normalizuar situatën në qytet, por parashikimet për motin e keq ngrenë shqetësime për përkeqësimin e mëtejshëm të gjendjes.