Reshjet e forta që kanë përfshirë Shqipërinë, duke përfshirë edhe kryeqytetin, kanë sjellë disa problematika në Tiranë. Kryetari i Bashkisë së Tiranës, Erion Veliaj, ka publikuar në rrjetet sociale fotografi nga puna e ekipeve të emergjencave në terren, të cilat po përpiqen të normalizojnë situatën.

Veliaj ka theksuar se falë punës së pandërprerë të ekipeve të emergjencave, rrugët e qytetit po mbahen nën kontroll dhe po bëhet monitorimi i çdo zone për të ofruar ndihmë aty ku është e nevojshme. Ai gjithashtu ka bërë thirrje që qytetarët të raportojnë çdo problematikë përmes aplikacionit “Tirana Ime” ose duke telefonuar në numrin emergjent 112.

“Prej disa orësh ekipet tona janë në terren, duke punuar për normalizimin e situatës. Shirat e rrëmbyeshëm të stinës kanë sjellë sfida, si thyerja dhe rrëzimi i disa pemëve, por falë punës së palodhur të djemve dhe vajzave të emergjencave, çdo rrugë po mbahet nën kontroll dhe çdo zonë është e monitoruar. Jemi pranë çdo qytetari që ka nevojë për ndihmë!” shkruan Veliaj në mesazhin e tij.