Kryeministri Albin Kurti, gjatë mbledhjes së Këshillit të Përgjithshëm të Vetëvendosjes, i bëri thirrje bashkëpartiakëve të tij që të jenë të kujdesshëm, pasi ai parashikon fushata shpifëse që synojnë të minimizojnë mbështetjen masive që gëzon qeveria e tij. Ai theksoi se pavarësisht mbështetjes së madhe, zgjedhjet e ardhshme fillojnë nga zero dhe është e domosdoshme që qytetarët të bindën për vazhdimin e rrugës së ndryshimeve dhe transformimeve.

“Ne duhet të luftojmë për çdo votë besimi të qytetarit dhe t’i bindim ata që ne jemi të përkushtuar për të vazhduar rrugën tonë të ndryshimit që e kemi nisur. Shumica dërmuese e popullsisë vazhdon të na mbështesë, por për zgjedhjet e ardhshme, të gjithë fillojnë nga numri zero,” tha Kurti, duke paralajmëruar që forca të ndryshme do të përpiqen të zbehin këtë mbështetje përmes shpifjeve dhe fushatave negative.

Kurti gjithashtu shprehu mirënjohjen e tij për bashkëpunimin me presidenten Vjosa Osmani dhe partitë partnere “Guxo” dhe “Alternativa”, duke konfirmuar se në zgjedhjet e ardhshme ata do të jenë sërish në koalicion. “Me Guxo dhe Alternativën do të jemi bashkë në koalicion ashtu siç kemi qenë bashkë në fushatë, në fitore, në qeverisje. Së bashku sërish në një listë për zgjedhjet e ardhshme,” tha ai.

Në fjalën e tij, Kurti foli edhe për përparimet e qeverisë së tij, përfshirë rritjen e pagës minimale dhe rritjen ekonomike, duke theksuar se këto arritje nuk janë bërë në kurriz të procesit demokratik. Ai gjithashtu shtoi se pavarësisht kërcënimeve dhe tentimeve për destabilizim nga Serbia, qeveria e tij ka arritur të ruajë sigurinë dhe stabilitetin.

“Rritjen ekonomike dhe përparimin demokratik nuk e kemi bërë në kurriz të procesit demokratik. Përkundrazi, kërcënimet më të mëdha të sigurisë i kemi pasur pikërisht gjatë qeverisjes tonë, por falë punës sonë kemi arritur të sigurojmë stabilitet për të gjithë,” përfundoi Kurti.