Shkencëtarët e kompanisë bioteknologjike “Tally Health” kanë zhvilluar një metodë të re të quajtur “CheekAge”, e cila ka potencialin për të përcaktuar moshën biologjike të qelizave të faqeve. Megjithëse vdekja mbetet një e vërtetë e pashmangshme, ekspertët tani mund të jenë një hap më afër përcaktimit të “datës së vdekjes” me anë të një testi të thjeshtë.

Sipas raportimeve nga Daily Mail, procesi përfshin marrjen e një strishe nga pjesa e brendshme e faqes dhe analizimin e ADN-së. Ky grup shkencëtarësh nga Tally Health, me seli në Nju Jork, ka krijuar një orë epigjenetike të quajtur “CheekAge” (“vitet e faqeve”), e cila është në gjendje të përcaktojë moshën biologjike të qelizave të faqeve, duke marrë parasysh faktorë të ndryshëm si gjenetika, stresi, gjumi, dieta dhe duhani.

Ekipi testoi këtë metodë në 1.513 individë, burra dhe gra, të lindur midis viteve 1921 dhe 1936, të cilët u monitoruan gjatë gjithë jetës së tyre. Duke i ndarë ata në grupe, analiza tregoi se ndryshimet në ADN ishin të lidhura ndjeshëm me vdekshmërinë. Për shembull, pjesëmarrësit në grupin më të lartë të “CheekAge” kishin 148 për qind më shumë gjasa të vdisnin në atë vit në krahasim me ata në grupin më të ulët.

Sipas ekipit të kërkuesve, metoda e tyre ishte më e saktë se orët e tjera epigjenetike, të cilat zakonisht analizojnë gjakun. Kjo sugjeron se një strishe e thjeshtë dhe jo invazive nga faqet mund të jetë një alternativë e vlefshme për studimin dhe monitorimin e biologjisë së plakjes. Gjetjet e këtij studimi janë publikuar në revistën “Frontiers in Aging”.

Megjithatë, disa ekspertë kanë shprehur rezervat e tyre, duke theksuar se kjo metodë nuk mund të parashikojë saktësisht ditën ose vitin e vdekjes. Prof. Murrell pranoi se ndryshimet në ADN janë teorikisht të kthyeshme dhe se ky zbulim mund të shërbejë si një paralajmërim për individët.

“Duke marrë parasysh se këto ndryshime janë rezultat i zgjedhjeve të stilit të jetesës—si pirja e duhanit, shtimi në peshë, ushqimi i dobët dhe mungesa e aktivitetit fizik—në kombinim me sëmundje të tjera si kanceri, obeziteti dhe diabeti, faktorët e tjerë të evidentuar pa testim epigjenetik mund të nxisin njerëzit të ndryshojnë zakonet e tyre të jetesës kur përballen me të dhënat nga ora epigjenetike,” tha Murrell.