Në dosjen e SPAK, janë zbardhur bisedat e Franc Çopjas me Agustin Çinarin, një punonjës të policisë në Durrës, i akuzuar si pjesë e grupit Çopja. Informacioni i dalë tregon se Çinari ka ndihmuar Franc Çopjan duke kryer kontrolle në sistemet për llogari të tyre dhe duke ofruar informacion mbi ngjarje kriminale dhe operacionet e policisë.

Në biseda, Çinari informon Çopjan për kontrollet e policisë dhe, në disa raste, ai ka marrë dhe transportuar vlera monetare, të cilat më pas i ka dërguar në destinacionet përkatëse, sipas udhëzimeve të marra nga Franc Çopja.

Një nga bisedat e zbardhura tregon diskutimin e tyre për vrasjen e Nuredin Dumanit. Disa fragmente nga biseda janë:

Franc Çopja: “Po vrasim, po tresim e prapë nuk i dilet.”
Franc Çopja: “Nga totali për vlerën e mallit (73 kg kokainë e shitur në Itali), 34,500 euro do i mbash ti.”
Agustin Çinari: “Në Port të ndihmoj unë nëse je i interesuar për të sjellë gjë në Shqipëri. Çdo e-mail që më vjen, marr numrin e kontejnerit dhe e veçoj. Pastaj ndonjë nga njerëzit vjen e merr mallin dhe e nxjerr nga Porti.”
Franc Çopja: “A ke njeri që të marrë përsipër vrasjen e Nuredin Dumanit? Më ka krijuar shumë probleme. Unë hallin e kam me tarzanin (Endrit Alibejn). Ofroj 1 milion euro.”
Agustin Çinari: “Vetëm mund ta arrestoj Nuredinin, por për këtë punë nuk më ke.”

Këto biseda hedhin dritë mbi lidhjet e dyshueshme mes policisë dhe grupeve kriminale, duke sugjeruar një nivel të lartë të korruptimit dhe bashkëpunimit në aktivitete të paligjshme.