Tre efektivë të policisë, të cilët u lënduan gjatë protestës së opozitës më 7 tetor, janë dërguar në orët e mesnatës në QSUT për trajtim më të specializuar në shërbimin e djegie-plastikës. Pasi morën mjekimin e duhur, dy prej tyre u larguan nga spitali në gjendje të mirë shëndetësore, ndërsa i treti vazhdon të trajtohet për plagë në kyçet e duarve dhe të këmbëve. Megjithatë, ai ndodhet jashtë rrezikut për jetën dhe po merr kujdes të specializuar.
Në QSUT, mbrëmjen e djeshme u paraqitën edhe dy protestues të plagosur. Njëri prej tyre mori mjekimin dhe u largua, ndërsa protestuesi tjetër mbetet i shtruar te djegie-plastika. Edhe ky i fundit është jashtë rrezikut për jetën, por vazhdon të marrë trajtim mjekësor për plagët e marra gjatë protestës.
