13 shtete amerikane dhe Distrikti i Kolumbias, ku ndodhet kryeqyteti Uashington, kanë paditur platformën sociale TikTok, duke e akuzuar për dëmtim të shëndetit mendor të fëmijëve. Padia e akuzon TikTok-un për ndërtimin e platformës në mënyrë të tillë që të nxisë varësinë e fëmijëve ndaj saj.

Ky veprim ligjor erdhi pas një hetimi kombëtar të nisur në mars 2022 nga një koalicion prokurorësh të përgjithshëm nga disa shtete, përfshirë Kaliforninë, Kentakin dhe Nju Xhersin. Në thelbin e padisë është algoritmi i TikTok, i cili përcakton përmbajtjen që shfaqet për përdoruesit në faqen kryesore të platformës (For You feed), duke mbushur atë me materiale të posaçme sipas interesave të tyre.

Padia thekson se algoritmi i TikTok është krijuar qëllimisht për të bërë fëmijët të varur nga përdorimi i tij, duke i mbajtur në platformë për periudha të gjata kohore dhe duke i bombarduar me njoftime edhe kur janë larguar nga aplikacioni. Sipas prokurorit të përgjithshëm të Distriktit të Kolumbias, TikTok ka vazhduar këtë praktikë edhe pse ishte i vetëdijshëm për efektet negative që do të kishte mbi shëndetin mendor të të rinjve, përfshirë ankthin dhe depresionin.

Përveç padive nga shtetet, TikTok është përballur edhe me presion nga qeveria federale e SHBA-së. Nëse kompania nënë e TikTok, ByteDance, me bazë në Kinë, nuk e shet platformën, ajo mund të përballet me një ndalim në SHBA nga mesi i janarit të vitit të ardhshëm.