Një ngjarje tragjike ndodhi gjatë fluturimit të Turkish Airlines nga Seattle në Stamboll, ku piloti i avionit, Ilcehin Pehlivan, humbi jetën gjatë udhëtimit. Avioni u detyrua të bënte një ulje emergjente në New York për shkak të gjendjes së rënduar të pilotit.
Sipas raportimeve, kapiteni Pehlivan u sëmur gjatë fluturimit, dhe përpjekjet e ekuipazhit për t’i dhënë ndihmën e nevojshme rezultuan të kota. Shkaqet e vdekjes së tij janë ende të paqarta dhe priten rezultatet e autopsisë për të sqaruar më tej situatën.
Zëdhënësi i linjës ajrore turke, Yahya Ustun, konfirmoi se nuk pati asnjë avari tjetër në avion, dhe pasagjerët zbritën në gjendje të mirë shëndetësore pas uljes emergjente. Avioni i tipit Airbus 350, me numër regjistrimi TC-LGR, po kryente fluturimin TK 204 me destinacion aeroportin e Stambollit.
