Uragani Milton po i afrohet Floridës dhe shumë njerëz janë detyruar të largohen nga shtëpitë e tyre për t’i shpëtuar katastrofës që pritet të godasë. Sipas Qendrës Kombëtare të Uraganeve (NCH), Miltoni po lëviz me shpejtësi drejt verilindjes përgjatë Gjirit të Meksikës dhe parashikohet të arrijë në tokë në zonën e Gjirit të Tampës në Florida, të mërkurën vonë në mbrëmje ose të enjten herët në mëngjes.

Meteorologët kanë paralajmëruar reshje të dendura, stuhi të fuqishme dhe erëra që arrijnë deri në 270 km në orë. Presidenti amerikan, Joe Biden, e ka cilësuar këtë si “stuhinë e shekullit”, duke theksuar rëndësinë e masave paraprake dhe evakuimit të shpejtë për të shpëtuar jetë. “Për më pak se 14 orë, Milton do të arrijë në Florida. Do të jetë stuhia e shekullit,” u shpreh Biden në deklaratën e tij.

Parashikimet janë që uragani Milton do të shkaktojë dëme të mëdha, sidomos në infrastrukturë, dhe konsiderohet si një nga uraganet më shkatërrimtare të 100 viteve të fundit në Shtetet e Bashkuara.