Marrëdhëniet mes Shqipërisë dhe Turqisë, veçanërisht në fushën ushtarake, janë intensifikuar edhe më tej gjatë vizitës së shkurtër të presidentit turk Recep Tayyip Erdogan në Tiranë, e cila ishte pjesë e mini-turit të tij në Ballkan. Media greke Zougla ka raportuar mbi këtë vizitë, duke e përshkruar atë si një moment kyç për të konfirmuar lidhjet e ngushta dypalëshe, sidomos përmes “dhuratës” që presidenti turk bëri për Shqipërinë: një numër dronësh kamikaze.

Kryeministri Edi Rama, në deklaratat e tij pas takimit, e cilësoi këtë veprim si një fazë të re në zhvillimin e industrisë ushtarake shqiptare dhe në forcimin e marrëdhënieve ushtarake mes dy vendeve. Ai nënvizoi rëndësinë e ndihmës turke, duke thënë se Turqia ka arritur një nivel të lartë në fushën e mbrojtjes globale dhe se kjo dhuratë për Shqipërinë është një hap i madh në këtë drejtim.

“Jemi jashtëzakonisht të lumtur që sot konfirmohet një fazë e re në forcimin e industrisë ushtarake të Republikës së Shqipërisë dhe në forcimin e kësaj marrëdhënieje, e cila është jetike për vendin tonë. Të gjithë e dinë që Turqia ka arritur një pikë shumë të lartë në botë në këtë fushë,” deklaroi Rama. Kryeministri gjithashtu theksoi se dhurata e dronëve kamikaze nuk duhet të ngjallë shqetësime për synimet e Shqipërisë, por duhet parë si një mesazh i qartë për të treguar se Shqipëria është “e pathyeshme”.

Në përfundim, Rama falënderoi presidentin Erdogan për këtë mbështetje strategjike, duke shtuar se dhurata simbolizon thellimin e marrëdhënieve mes dy vendeve në një moment kritik për botën, duke e përshkruar atë si një veprim me mesazhe të qarta për bashkëpunimin dhe sigurinë e përbashkët.

Kjo vizitë dhe dhurata e Turqisë për Shqipërinë shërben si një tjetër dëshmi e marrëdhënieve të ngushta strategjike mes dy vendeve, duke treguar rolin kryesor të Turqisë si partner ushtarak dhe mbështetës në rajonin e Ballkanit.