Met Gjura, babai i Elenora Toçit, e cila tragjikisht u mbyt në krevat nga bashkëshorti i saj, Lulzim Toci, në banesën e tyre në Itali, ka hedhur akuza të rënda ndaj krushqve të vajzës së tij. Ai ka deklaruar se vjehrrit e Elenorës kanë ushtruar tortura ndaj saj, duke e lënë atë në kushte të vështira.

Gjatë një intervistë, Met Gjura tha se Elenora ka përjetuar keqtrajtim serioz dhe se familja e saj nuk e ka mbështetur siç duhet. “E kishin torturuar, sepse mua s’më kishin treguar, më pas vajza më tregoi. Edhe asistencën ia kishin marrë tek shtëpia. Unë ju kam çuar bukë, e linin pa bukë e kurrgjë,” tha ai, duke theksuar se i dërgonte ushqim për të vajzën dhe dy djemtë e saj të mitur.

Ai përshkroi një bisedë me Elenoran, në të cilën ajo shprehte shqetësime për situatën e saj, duke thënë: “I thashë si je? A je mirë? Ajo më tha se nuk ka qenë mirë, ka qenë në spital me atë pronarin, nuk e di se çfarë ka ndodhur.” Met Gjura shtoi se ai kishte pranuar të ndante nga bashkëshorti i saj për të mirën e djemve, por gjendja e vajzës së tij vazhdonte të përkeqësohej.

Elenora u martua në moshën 16-vjeçare dhe, sipas babait të saj, ajo e kishte njohur vetë Lulzimin. Ai nënvizoi se krushqit e saj e kishin lënë pa ushqim dhe se kishin abuzuar me të. “E kanë lënë pa bukë, i merrnin asistencën. Më pas më tha vajza se ishin keqtrajtuar,” deklaroi ai.

Ndërkohë, ai ka shprehur keqardhje për ngjarjen tragjike që ndodhi pas bisedës së tij me Elenorën, kur ajo e informoi për gjendjen e saj të vështirë. “Pas disa orësh, dikush më tha se Elenora kishte ndërruar jetë. Mua më ka vdekur edhe një djalë 13-vjeçar,” përfundoi Met Gjura, duke shprehur dhimbjen e tij të thellë për humbjen e vajzës.