Në qytete të ndryshme të Turqisë janë zhvilluar protesta masive kundër vrasjeve të grave, veçanërisht pas raportimit të dy rasteve tronditëse në Stamboll. Qindra gra dhe aktivistë kanë dalë në rrugë për të shprehur zemërimin e tyre dhe për të denoncuar qeverinë e presidentit Recep Tayyip Erdogan dhe partinë e tij AKP, të cilën e akuzojnë për mungesën e veprimeve të nevojshme për mbrojtjen e jetës së grave.
Gjatë protestave, organizatorja Gunesh Fadime Ahsahin i drejtoi turmës një akuzë të fortë, duke thënë: “Ju jeni një qeveri që lejoni vrasjen e grave”. Kjo thirrje pasqyronte zhgënjimin e thellë të protestuesve ndaj asaj që ata e perceptojnë si neglizhencë të autoriteteve për të parandaluar dhunën e vazhdueshme ndaj grave. Gulizar Sezer, nëna e një gruaje të re të vrarë, kërkoi që t’i jepet fund “masakrimit të vajzave tona”, duke rrëfyer për dhimbjen e humbjes së vajzës së saj, trupi i së cilës u gjet në qershor, i hedhur në det dhe i mbështjellë me një tepih.
Protesta të ngjashme janë organizuar edhe në qytetet e tjera, përfshirë Ankaranë dhe Izmirin, sipas Federatës për të Drejtat e Grave. Këto manifestime kanë vazhduar çdo ditë gjatë javës në qytete të ndryshme, veçanërisht në kampuset universitare, ku studentët janë shprehur kundër dhunës ndaj grave.
Nxitja e protestave erdhi pas dy vrasjeve brenda një harku kohor prej vetëm 30 minutash në Stamboll, ku viktimat dhe i dyshuari për vrasje ishin të gjithë 19 vjeç. I dyshuari, pasi vrau dy vajzat, kreu vetëvrasje. Këto ngjarje kanë thelluar shqetësimet për një problem të vazhdueshëm në Turqi, ku dhuna ndaj grave ka qenë një çështje e njohur prej vitesh. Erdogan më parë ka fajësuar faktorë si alkooli dhe rrjetet sociale për vrasjet e tilla, por protestuesit kërkojnë veprime më të forta dhe angazhime konkrete nga qeveria për të ndalur këtë valë dhune.
Presidenti turk është zotuar kohët e fundit për të forcuar sistemin gjyqësor dhe për të luftuar krimin, por kjo nuk ka qetësuar protestuesit, të cilët ndihen të zhgënjyer nga tërheqja e Turqisë nga Konventa e Stambollit në vitin 2021. Kjo marrëveshje e Këshillit të Evropës kishte si qëllim parandalimin e dhunës ndaj grave dhe detyrimin e autoriteteve për të hetuar dhe ndëshkuar dhunuesit.
Sipas një grupi monitorues, deri më tani në vitin 2024 janë regjistruar 299 vrasje të grave në Turqi, një shifër alarmante për një vend me 85 milionë banorë.
