Një 15-vjeçar, i cili vrau me thikë bashkëmoshatarin e tij mbrëmjen e 14 tetorit në qytetin e Shkodrës, ka dhënë dëshminë e tij në polici. Ai ka deklaruar se ishte viktima, Emiljano Gjoni, që e goditi i pari gjatë një konflikti mes tyre.

“E qëllova me thikën e tij. Fillimisht u zumë, pastaj ai më qëlloi në sup me thikë, unë mora thikën e tij dhe e qëllova disa herë,” ka thënë autori para policisë, në kushte të rënda psikologjike. Edhe pse ai ka një plagë në sup, policia dyshon nëse kjo plagë është rezultat i konfliktit të ndodhur.

Ngjarja ndodhi rreth orës 19:30 në lagjen “Skënderbeg” të qytetit, ku pas sherrit, autori i mitur qëlloi disa herë viktimën me thikë dhe më pas u largua nga vendi i ngjarjes. Viktima u gjet i gjakosur nga një kalimtar i rastit, i cili e dërgoi në spital, por fatkeqësisht ai nuk mundi t’u mbijetonte plagëve dhe ndërroi jetë. Vetëm tre orë pas ngjarjes, policia arriti të kapë dhe identifikojë autorin.