Gjykata e Lartë ka refuzuar kërkesën e ish-deputetit të Partisë Demokratike, Ervin Salianji, për pezullimin e dënimit me burg. Vendimi u mor nga tre gjyqtarët Sokol Binaj, Sandër Simoni dhe Ilir Panda, të cilët e detyruan Salianjin të vazhdojë të vuajë dënimin prej 1 viti burg në burgun e Fierit, siç ishte përcaktuar nga Gjykata e Apelit me Juridiksion të Përgjithshëm.

Tashmë pritet që mbrojtja e Salianjit të paraqesë rekurs në Gjykatën e Lartë kundër vendimit të 26 shtatorit, të cilin e ka konsideruar të motivuar politikisht.

Mbrojtja e Salianjit kishte paraqitur disa argumente në kërkesën për pezullim të dënimit, përfshirë pretendimet se ekzekutimi i dënimit është kryer pa një arsyetim të plotë të vendimit, duke shkelur Nenin 142/1 të Kushtetutës së Shqipërisë. Avokatët e tij argumentuan gjithashtu se vendimi po ndikon në të ardhmen politike të Salianjit, i cili është i angazhuar në fushatën elektorale të Partisë Demokratike në zonën e Elbasanit.

Salianji u arrestua më 27 shtator 2024, një ditë pasi Gjykata e Apelit la në fuqi vendimin e Gjykatës së Tiranës të dhënë më 18 dhjetor 2019. Ish-deputeti u shpall fajtor për “kallëzim të rremë” lidhur me audio-përgjimin e dosjes “Babale”, ku pretendonte se vëllai i ish-ministrit të Brendshëm, Fatmir Xhafaj, ishte përfshirë në trafik droge.