Sumeja Zumberi, në moshën 18-vjeçare, realizoi ëndrrën e saj të kahershme duke hapur kafenenë “Baresha” në Bremen. Ajo ka tërhequr vëmendjen për konceptin unik të lokalit: burrat nuk lejohen në ambientet e kafenesë së saj. Ky është i pari vend i këtij lloji në qytet, dhe ndodhet në lagjen Gröpelingen, ku më shumë se 60 përqind e banorëve kanë prejardhje migrante.

Ideja për të hapur një kafene të tillë erdhi si përgjigje ndaj faktit që shumë kafene në zonë ishin të mbipopulluara me burra, duke krijuar një hapësirë të veçantë për gratë. Që nga hapja e kafenesë, gjashtë javë më parë, koncepti ka nxitur një debat të gjallë në internet, por Zumberi mbetet e patundur dhe e qetë në lidhje me vendimin e saj.

“Jam e sigurt që gratë ndihen më rehat këtu se kudo tjetër.Sidomos ato që kanë pasur tashmë përvoja të këqija dhe nënat që ushqejnë fëmijët me gji ose që vijnë me fëmijë këtu. Burrat lejohen të blejnë një akullore në banak, por nuk lejohen të qëndrojnë”, tha Sumeja Zumberi për BILD.
Për menaxhimin e biznesit të saj, mbështetetja më e madhe vjen nga familja, e cila prej 30 vitesh jeton në Gjermani.
“Ne jemi shqiptarë nga Kosova. Për financat dhe sigurimet kujdeset babai i saj, ndërsa në restorant ndihmon nëna“, shprehet ajo.
Salloni i kafeve dhe akulloreve ka një hapësirë ​​për rreth 30 gra. Fillimi ka qenë i mbarë.
“Kam marrë vetëm reagime pozitive nga të gjithë deri më tani”, shton ajo.
Një kliente, që vjen shpesh me shoqet ose motrat e saj, shpjegon: “Ndihem më mirë këtu, më rehat, e patrazuar”.