Numri i emigrantëve që janë rikthyer në Itali ka arritur në katër pas mbërritjes mëngjesin e sotëm në kampin e Gjadrit në Shëngjin. Dy prej tyre janë rikthyer në Itali për shkak të gjendjes së tyre shëndetësore.

Më herët, dy të tjerë ishin nisur drejt Italisë, pasi pas verifikimeve u konstatua se ishin të mitur, ndërsa gjithsej në kamp mbërritën 16 persona. Sipas marrëveshjes mes shtetit shqiptar dhe atij italian, në kampet në Shqipëri do të mbahen vetëm emigrantët meshkuj, ndërsa gratë dhe minorenët do të procedohen në qendrat e refugjatëve në Itali.

Kujtojmë se anija italiane me grupin e parë të emigrantëve arriti në portin e Shëngjinit mëngjesin e së mërkurës, duke shënuar fillimin e zbatimit të një plani të diskutueshëm për të përpunuar mijëra kërkesa për strehim jashtë Italisë. Emigrantët iu nënshtruan menjëherë kontrolleve mjekësore, ndërsa u ofruan edhe veshje e ushqim.