Kryetari i PD-Demokratët Euroatlantikë, Lulzim Basha, gjatë vizitës së tij në Berlin, zhvilloi një takim me deputetin e Bundestagut dhe ish-sekretarin e përgjithshëm të CDU-së, Paul Ziemiak. Gjatë bisedës, Basha dhe Ziemiak u përqendruan në situatën aktuale politike dhe sociale në Shqipëri, duke diskutuar veçanërisht për nevojën e krijimit të mundësive për të rinjtë shqiptarë.

Basha nënvizoi rëndësinë e ofrimit të shpresës dhe mbështetjes për të rinjtë që të kontribuojnë për vendin e tyre, duke ndërtuar një të ardhme të qëndrueshme në Shqipëri, në vend që të kërkojnë alternativa jashtë vendit. Ai theksoi se kjo është një domosdoshmëri për zhvillimin e mëtejshëm të Shqipërisë dhe për të ndaluar ikjen e trurit.

Në një postim të tij, Basha shprehet: “Ishte një kënaqësi të ritakohesha me Paul Ziemiak. Diskutuam rreth situatës aktuale në vend dhe domosdoshmërinë për t’u ofruar të rinjve mundësi dhe shpresë, në mënyrë që ata të kontribuojnë për të ardhmen e tyre dhe të Shqipërisë.”